Lehen Hezkuntzako 2. kurtsotik aurrera, ikasleek ikasturtean gutxienez bidaia bat egiten dute. Bidaien iraupena eta konplexutasuna egokituta daude partaideen adinera.
St. Patrick’s English Schoolen ustez, bidaiek osatu egiten dute ikasleen prestakuntza pertsonala eta akademikoa; besteak beste, alderdi hauek nabarmenduta: erantzukizuna, autonomia, errespetua, talde-espiritua eta esperientzian oinarritutako ikaskuntza.
Sendaviva (LH 2)
Sendaviva parkea, Nafarroan, agertoki aproposa da ikasturtea ixteko eta emozioz eta arduraz betetako urteari agurra emateko.
Askorentzat, adin bereko beste ikaskide batzuekin batera familiagunetik kanpo gaua ematearen lehen esperientzia da. Hasierako urduritasunak gorabehera, pozgarria eta oso atsegina da. Ikasleak autonomiaren bidean barneratzen hasten dira, haien heltze-prozesuan ezinbestekoak izango diren esperientziak biziz: ohea egitea, beren arropaz arduratzea…
Eta ingurune natural batean biziko dute hori, beste izaki bizidun batzuekin kontaktuan, bi gelak elkarrekin, inolako bereizketa edo desberdintasunik gabe.
Kutsu eztia eta oroitzapen eztia uzten ditu, etxerako itzuleran familiarekin partekatu ahal izateko. Sendaviva, bizipenen bidea!
IrriSarri Land (LH 3)
Foru Komunitatea, era berean, Lehen Hezkuntzako 3. kurtsoko bidaiaren agertokia da: abentura-parke bat, gure abentura pertsonalak eta esperientzia aberasgarri biziak igarotzeko leku aproposa.
Tirolina, arborismoa, ikatza egitea eta amuarrainei jaten ematea dira ikasleek aire zabalean egiten dituzten jardueren adibide batzuk. Jarduera horiek askatasuna-segurtasuna binomio desiratua ziurtatzen duen leku batean egiten dira. Gozatzeko lekua da, norberaren gelako edo beste gelako ikaskideekin harreman estuagoak ezarri ahal izateko eta tutoreak eta irakasleak hobeto ezagutu ahal izateko lekua. Harreman hori ikasturtean zehar estutuko da, ikasturtearen berezko aupada guztiak gainditzeko beharrezko konfiantza sortuta.
PAL (Play And Learn) (LH 4)
Lehen Hezkuntzako 4. kurtsoko ikasleek parte hartzen dute ikastetxez kanpoko bidaia honetan. Bi egunez, jarduera ludikoak eta prestakuntzakoak egiten dituzte Estatu Batuetako kultura autoktonoen historiaren eta ohituren inguruan, Hondarribiko Juan Sebastian Elkano aterpetxean eta aldirietan. Dena ingelesez da. Azkenean, Estatu Batuetako jatorrizko biztanleen kulturaren hainbat alderdi ezagutzen dituzte –haien artea, musika, dantza…–, AEBen erliebeaz eta geografiaz gainera.
Baratze (LH 5)
Behatzea eta ikertzea; horiek dira kurtsoko gainerako ikaskideekin batera egonaldi honetaz bete-betean gozatzeko gakoak.
Ikasleek ibilbide ekologikoak egiten dituzte eta zenbait lantegitatik pasatzen dira: baratzea, landetxea, elikagaien transformazioa, mikologia eta zura lantzea.
Arotz Enea (LH 6)
Arotz Enea ingurumen-heziketako zentro bero eta erosoa da. Etxarri Larraunen dago, Nafarroan, eta bertara joaten dira Lehen Hezkuntzako 6ko ikasleak. Bertan, ingurumenaren eta haren zaintzaren inguruan sentsibilizatzeko hainbat jarduera egiten dituzte.
Bost egunez euskaraz egiten dute elkarbizitza, eta, besteak beste, jarduera hauek egiten dituzte: mendiko ibilaldiak, bisitak inguruko herrietara, egagropilak, meteorologia, itzal-jokoak…
Instalazio zabalek aukera ematen dute bizikidetzarako, une formal eta egituratuenetan ez ezik, aisialdietan ere. Horietan, ikaskideak sakonago ezagutu eta harreman estuagoak finkatu ditzakete.
Larraul (DBH 1)
DBH 1eko ikasleek hiru egun ematen dituzte Larraulgo aterpetxean, Donostiatik gertu. Euskaraz errazago mintzatzen eta hizkuntza menderatzen laguntzen duten jarduerak egiten dituzte. Ikasgelan aurretiaz egindako lan guztiak erabateko zentzua hartzen du egonaldian. Herriko museora eta elizara eta ur-errota zahar batera bisitak egiten dira, mendi-ibilaldiez, tradiziozko jokoez… gainera. Eta, batez ere, bizikidetza dago talde-kohesioa sendotzeko.
Barcelona (DBH 2)
Maiatzean, 2. kurtsoko taldeak Bartzelonarako ohiko bideari ekiten dio. Aurretik, Huescan gelditzen da jardueren bidez abenturan murgiltzeko. Jardueren artean, raftinga eta arborismoa daude. Bartzelonako gune nagusiak eta monumentu ospetsuenak ezagutu ondoren, taldea Port Aventurarantz abiatzen da. Bertan, sekulako une dibertigarriak bizitzen dituzte. Bidaia ahaztezin horretan, kirola, kultura eta aisia konbinatzen dira.
Ruta del Cid (DBH 3)
Maiatzaren hirugarren astean, DBH 3ko taldeak aurrez aurre ezagutzen ditu ikasturteko curriculum-programazioan agertzen diren lekuak: San Millán de la Cogolla (gaztelaniaren jatorriekin, euskaraz idatzitako lehen hitzekin… lotuta), Burgos, Carrión de los Condes, Paredes de Nava, Villalcázar de Sirga, Santiago bidea, Canal de Castilla...
Ikasgelan jorratutako gaiei benetakotasuna emateaz gainera, helburua da ikasleengan bidaia kulturalekiko interes piztea, dokumentatzeko baliabideak eskaintzea, leku interesgarriak hautatzea eta ezagunak ez dituzten lekuetan orientatzea. Eta, gainerako bidaietan bezala, errespetua, autonomia, soziabilitatea… sustatu nahi ditugu.
El Quijote (DBH 4)
Lau egunetan zehar, DBH 4ko taldeak literatura-ibilbide bati jarraitzen dio, aurretik ikasgelan egindakoari, hain zuzen. Besteak beste, leku hauek bisitatzen ditu: Salamanca –Tormesko itsumutila, Frai Luis–; Ávila –Santa Teresa–; Segovia –erromanizazioa–; Toledo –hiru kulturen arteko bizikidetza: kristaua, hebrearra eta musulmana– eta Mantxa –Kixote–. Bidaia Almagron amaitzen dugu. Bertan, Urrezko Mendeko antzezpen bat ikusten dugu Corral de Comedias-en.
Pirineos (Batxilergoa 1)
Giza Zientzietako sailaren esparruan, 2006-7 ikasturterako proposatu zen Pirinioetan zeharkaldi bat egitea Batxilergoko 1. kurtsoko ikasleekin. Zeharkaldiaren formatua aukeratu zen. Izan ere, ingurune natural batean esfortzu fisiko jarraitua egitea metodologia egokia zirudien ezarritako helburuak lortzeko. Hala, Pirinioak hautatu ziren, hurbil daudelako eta, halaber, naturan bete-betean murgiltzeko aukera ematen dutelako. Eta Batxilergoko 1. kurtsoan egitea erabaki zen, une bikaina dirudielako irteerarako planteatutako edukiak garatzeko.
Oraindik indarrean dagoen irteera honetarako, jarraian adierazten diren gaiekin lotutako helburuak ezarri dira: ingurune natural eta kulturalarekiko elkarreragina, hizkuntzaren garapena, garapen fisikoa eta gizarte-elkarreragina.
Zeharkaldia Echo herrian hasi eta Canfranc-en amaitzen da. Bost gau ematen dira inguruko beste hainbeste aterpetxetan; adibidez: Bisaltico eta Lizara. Eguna mendi erdian igarotzen da. Asmo bakarra da ibiltzea, naturan eta landa-ingurunean murgilduta sentitzea, lasaitasuna eta isiltasuna sentitzea, flora- eta fauna-espeziak ikustea, atsedenaldietan irakurtzea eta marraztea… azken batean, guztiok elkarrekin bizitzea naturaren erdian, hiriko bizitzatik eta erosotasun eta teknologia modernoetatik urruti.
Esperientzia aparta da. Hasiera batean, ingurune horri buruzko ezjakintasunak edo esperientziarik ezak eraginda beldurrak eta aurreiritziak egon badaitezke ere, egindako ahaleginaren ondoriozko gogobetetzeak eta norberaren bizipenek eskakizun handiko irteera bihurtzen dute jarduera, desberdina eta oso aberasgarria.
Italia (Batxilergoa 2)
Bidaia hau eskolaldian zehar ikasleek egindako irteera eta bidaia guztien amaiera da. Italia historikoan barrena ibilbide bizia eta zabala egingo da, guztien oroitzapenean betirako geratuko dena. Azken agur ahaztezin horretan, Milan, Verona, Venezia, Florentzia, Pisa, Siena eta Erroma ezagutuko dira. Beste kate-maila bat da ikasleen prestakuntza humanistikoan; etorkizunerantz eta prestakuntza unibertsitario eta profesionalerantz proiektatuko dituen azkena eskolaldian.
